టాలీవుడ్ కు ఏ పిచ్చి పడితే అదే. అదెంతవరకు అవసరం, ఎంత వరకు జనానికి చేరుతుంది అని చూడరు. త్రీడీ టెక్నాలజీ వచ్చిన కొత్తలో అంతే. చకచకా తామర తంపర మాదిరిగా సినిమాలు వచ్చేసాయి. ఆ తరువాత మరి అవుట్. అదో వేలంవెర్రి అంతే. ఇప్పుడు కొత్తగా వర్చ్యువల్ రియాలిటీ టెక్నాలజీ మీద పడ్డారు. ఇలాంటి టెక్నాలజీలోకి మార్చిన విడియోను చూడాలంటే, ప్రత్యేకమైన వీఆర్ బాక్స్ కావాలి. దాంట్లో ఫోన్ అమర్చి, దానిద్వారా ఆ విడియో ను చూసుకోవచ్చు.
దానివల్ల 360 డిగ్రీల ఏంగిల్ వ్యూలో సినిమాను చూడడం సాధ్యమవుతుంది. అంటే ప్రతి విషయంలో డెప్త్ తెలుస్తుంది. ఇలా ఓ డబ్బాను కళ్లకు తగిలించుకుని చూడడం అన్నది కాస్త చికాకైన వ్యవహారం అందుకే ఎంతగా పుష్ చేస్తున్నా ఇది క్లిక్ కావడం లేదు.
బాహుబలి 2 సినిమాను ఏకంగా వర్చ్యువల్ రియాలిటీ టెక్నాలజీ లో కూడా విడుదలకు సన్నాహాలు చేస్తున్నారు. ఇలా వర్చ్యువల్ రియాలిటీ లో కన్వెర్ట్ చేయడానికి కేవలం బాహుబలి 2 కు చేస్తున్న ఖర్చు 25 కోట్లు. ఇది చూసి, సినిమా అంతా ఎలాగూ చేయలేం కనీసం టీజర్ లేదా ట్రయిలర్ ఇలా చేస్తే బాగుంటుందేమో అన్న ఆలోచన బయలు దేరింది టాలీవుడ్ లో. ఆ మధ్య హైపర్ ట్రయిలర్ ను వర్చ్యువల్ రియాలిటీలోకి కన్వెర్ట్ చేసారు. కానీ ఎవరికీ తెలియనే తెలియదు.
ఇప్పుడు లేటెస్ట్ విషయం ఏమిటంటే, మహేష్-మురగదాస్ కాంబినేషన్ లో తయారయ్యే సినిమా టీజర్ కూడా ఈ వర్చ్యువల్ రియాల్టీ టెక్నాలజీ లో విడుదల చేయడానికి వర్క్ స్టార్ట్ అయింది. పది సెకెండ్ల టీజర్ వుంటుంది. దీన్ని లాస్ ఏంజిల్స్ లోని ఓ కంపెనీ తయారుచేస్తుంది. టీజర్ ఇక్కడ ప్రత్యేకంగా షూట్ చేసి, ఎడిట్ చేసి, ఆర్ ఆర్ మిక్స్ చేసి పంపిస్తే, అక్కడ వాళ్లు కన్వెర్ట్ చేసి పంపిస్తారు. దీని కోసం లక్షల్లో ఖర్చు మాత్రం తప్పదు. కొన్నాళ్లు ఇదో మోజు కొనసాగుతుంది.