సుకుమార్ దర్శకత్వంలో రామ్ చరణ్ చేస్తున్న సినిమా ఫస్ట్ షెడ్యూల్ పూర్తిచేసుకుంది. రాజమండ్రి పరిసర ప్రాంతాల్లో షూటింగ్ జరుపుకుంటున్న ఈ సినిమాకు అభిమానుల తాకిడి ఎక్కువ కావడంతో 4 రోజుల ముందే షెడ్యూల్ ముగించారు. నెక్ట్స్ షెడ్యూల్ వివరాల్ని త్వరలోనే ప్రకటిస్తారు.
ఫస్ట్ షెడ్యూల్ లో భాగంగా రామ్ చరణ్ పై కొన్ని కీలకమైన సన్నివేశాలు తెరకెక్కించారు. చెర్రీ-సమంత మధ్య ఓ సాంగ్ కూడా పిక్చరైజ్ చేశారు. వీటితో పాటు పలువురు క్యారెక్టర్ ఆర్టిస్టులు పాల్గొన్న సన్నివేశాల్ని కూడా షూట్ చేశారు. అయితే ఫస్ట్ షెడ్యూల్ ముగిసినప్పటికీ చెర్రీ-సుక్కూ సినిమాకు సంబంధించిన ప్రశ్నలు మాత్రం అలానే మిగిలిపోయాయి.
రామ్ చరణ్ ఈ సినిమాలో చెవిటివాడిగా నటిస్తున్నాడనే వార్త మూవీ ఓపెనింగ్ నుంచి హల్ చల్ చేస్తోంది. మరోవైపు ఈ సినిమాకు రేపల్లె అనే టైటిల్ పెట్టారంటూ ప్రచారం సాగుతోంది. వీటికి తోడు సినిమాలో చరణ్, చేపలుపట్టే వ్యక్తిగా కనిపించనున్నాడనే టాక్ కూడా ఉంది. ఈ ప్రశ్నలకు సమాధానాలు తెలియకుండానే ఫస్ట్ షెడ్యూల్ ముగించారు.
ఫస్ట్ షెడ్యూల్ లో షూట్ చేసిన రష్ ను చిరంజీవికి చూపిస్తారు. ఫూటేజ్ లో కీలకమైన సన్నివేశాల్ని చిరంజీవి చూసి ఓకే చేసిన తర్వాత సెకెండ్ షెడ్యూల్ స్టార్ట్ చేస్తారు.