ప్రస్తుతం వరుసపెట్టి సినిమాలు చేస్తున్నాడు పవన్. ఒక సినిమా కంప్లీట్ అవ్వగానే మరో సినిమాను సెట్స్ పైకి తీసుకొస్తున్నాడు. ఇలా రెస్ట్ లేకుండా సినిమాలు చేస్తున్నప్పటికీ, పవన్ ఖాతాలో పెండింగ్ ప్రాజెక్టులు మాత్రం అలానే ఉన్నాయి. నిజానికి ఆ సినిమాలు ఎప్పుడొస్తాయో.. అసలు వస్తాయో రావో కూడా ఎవరికీ తెలీదు.
దాసరి నారాయణరావుతో కలిసి పవన్ ఓ సినిమా చేయాల్సి ఉంది. ఆ విషయాన్ని అటు పవన్, ఇటు దాసరి ఇద్దరూ నిర్థారించారు. ఆమధ్య కథాచర్చలు కూడా జరిగినట్టు వార్తలు వచ్చాయి. కానీ ప్రస్తుతం ఈ ప్రాజెక్టు గురించి ఎవరూ మాట్లాడ్డం లేదు. పైగా దాసరి ఆరోగ్యం ఈమధ్య ఏం బాగాలేదు. ఇప్పుడిప్పుడే కోలుకుంటున్నారాయన. ఇలాంటి టైమ్ లో పవన్-దాసరి ప్రాజెక్టు మరోసారి తెరపైకి వస్తుందని ఎవరూ ఎక్స్ పెక్ట్ చేయరు.
పవన్-టీఎస్ఆర్ ప్రాజెక్టును కూడా పెండింగ్ ప్రాజెక్టు కిందే చెప్పాలి. ఎందుకంటే, దీనిపై ఇప్పటివరకు ఎలాంటి సమాచారం లేదు. త్రివిక్రమ్ దర్శకత్వంలో చిరంజీవి-పవన్ కాంబినేషన్ లో రావాల్సిన మెగా మల్టీస్టారర్ సినిమా ఇది. ఈ ప్రాజెక్టును ఎనౌన్స్ చేసినప్పుడు చూపించినంత ఉత్సాహం ఇప్పుడు కనిపించలేదు. పైగా పవన్, చిరు, త్రివిక్రమ్ ముగ్గురూ ఫుల్ బిజీ.
పవన్ కెరీర్ లో ఎప్పట్నుంచో నలుగుతున్న మరో సినిమా కోబలి. ఈ సినిమాను ఎప్పటికైనా సెట్స్ పైకి తీసుకొస్తానని పవన్ అప్పుడప్పుడు ప్రకటిస్తుంటారు. ఈ సినిమా కోసమే పవన్ కల్యాణ్ క్రియేటివ్ వర్క్స్ అనే బ్యానర్ కూడా స్థాపించానని అప్పట్లో చెప్పుకొచ్చారు. ఈమధ్య ఈ స్టోరీకి త్రివిక్రమ్ మెరుగులు దిద్దినట్టు వార్తలు కూడా వచ్చాయి. కానీ పవన్ కు ఉన్న వ్యక్తిగత, రాజకీయ, వృత్తిపరమైన కమిట్ మెంట్స్ కారణంగా ఇప్పట్లో కోబలి సెట్స్ పైకి రాదు.
తను నిర్మాతగా, రామ్ చరణ్ ను హీరోగా పెట్టి ఓ సినిమా చేస్తానని పవన్ ప్రకటించారు. పైన మనం చెప్పుకున్న సినిమాలతో పాటు ఇది కూడా పెండింగ్ ప్రాజెక్టు కిందకే వస్తుంది. ఎన్నాళ్ల నుంచో నలుగుతున్న ఈ సినిమా ఎప్పుడు తెరపైకి వస్తుందనేది కచ్చితంగా ఎవరూ చెప్పలేకపోతున్నారు.