మెగాస్టార్‌ చిరంజీవి అదరగొట్టేశాడట.. డాన్సుల్లో ఇదివరకటి ఈజ్‌ చూపించాడట.. గెటప్‌ అదుర్స్‌ అనే రేంజ్‌లో వుందట.. మెగాస్టార్‌ ఈజ్‌ బ్యాక్‌.. ఇలా ఏవేవో మాటలు.. ఆ మాటలకు దన్నుగా కొన్ని ఫొటోలు.. సినీ 'మా' అవార్డ్స్‌ వేడుక కోసం చిరంజీవి స్టేజ్‌ పెర్ఫామెన్స్‌ ఇవ్వడం గురించి జరుగుతున్న ప్రచారం ఇదే మరి.
ఇప్పటికే చిరంజీవి లైవ్‌ పెర్ఫామెన్స్‌కి సంబంధించి కొన్ని ఫొటోల్ని విడుదల చేశారు. వీడియో బైట్‌ కూడా చాలా చిన్నదొకటి విడుదలైంది. దాంతో, అభిమానుల్లో ఆనందంతోపాటు, టెన్షన్‌ కూడా పెరిగిపోయింది. తాను హీరోగా నటించబోయే కొత్త సినిమా.. పైగా అది రీ-ఎంట్రీ సినిమా.. దానికి టీజర్‌గా, చిరంజీవి సినీ 'మా' అవార్డ్స్‌ వేదికను ఎంచుకున్న విషయం విదితమే.
ఈ వేడుకకు సంబంధించి మరికొన్ని వీడియో బైట్స్‌ వెలుగులోకి వచ్చాయి. అయితే అభిమానుల్లో ఉత్కంఠను కొనసాగిస్తూ, మళ్ళీ టీజర్‌లానే ఈ వీడియో బైట్స్‌ కూడా వున్నాయి. అయితేనేం మెగాస్టార్‌ ఈజ్‌ బ్యాక్‌.. అనేస్తున్నారు అభిమానులు. 'ముఠామేస్త్రి', 'శంకర్‌దాదా జిందాబాద్‌' తదితర సినిమాల్లోని గెటప్స్‌ని పవన్‌ సినీ 'మా' అవార్డ్స్‌ కోసం వేయడం గమనార్హం. 'శంకర్‌దాదా' వాకింగ్‌ స్టయిల్‌ కూడా ఈ వీడియో బైట్స్‌లో ప్రధాన ఆకర్షణగా నిలిచింది.
తన సూపర్‌ హిట్‌ సాంగ్స్‌ని 'మెడ్లీగా' చేసి, డాన్స్‌ ఫ్లోర్‌ని అదరగొట్టేశారట చిరంజీవి. ఎలా చేశారు.? అన్నది పూర్తిగా తెలియాలంటే మాత్రం, ఈ నెల 25 తర్వాతే తెలుస్తుంది. ఈలోగా మరిన్ని టీజర్స్‌తో అభిమానుల్ని ఖుషీ చేయనున్నారట.