వారాహి చలన చిత్ర సంస్థను స్టార్ట్ చేసి, ఓ మంచి సంస్థ అని పేరు సంపాదించారు నిర్మాత సాయి కొర్రపాటి. ఓ పక్క భారీ సినిమాలు, మరోపక్క చిన్న సినిమాలు చేసుకుంటూ వస్తున్నారు. సక్సెస్ అయినా కాకున్నా, మంచి సబ్జెక్ట్ అంటే తెరకెక్కిస్తూనే వస్తున్నారు. మరోపక్క సీడెడ్ నుంచి కృష్ణ, వైజాగ్ వంటి ప్రాంతాలకు డిస్ట్రిబ్యూషన్ వ్యవస్థను విస్తరించారు.
ఇప్పుడు ఇదే ఊపుతో విదేశాల్లో డిస్ట్రిబ్యూషన్ కు శ్రీకారం చుడుతున్నారు. వారాహి ఇంటర్నేషనల్ అనే సంస్థను భారీ రేంజ్ లో ఒకేసారి లాంచ్ చేసే పనిలో సాయి కొర్రపాటి వున్నట్లు వినికిడి. కేవలం తమ సినిమాలే కాకుండా, బయటి సినిమాలు కూడా ఓవర్ సీస్ లో డిస్ట్రిబ్యూట్ చేయడానికి సాయి ఈ సంస్థను ప్రారంభిస్తున్నట్లు తెలుస్తోంది.
అదే విధంగా కేవలం ఓవర్ సీస్ డిస్ట్రిబ్యూషన్ ను మాత్రమే కాకుండా, మరి కొన్ని సినిమా ప్రాజెక్టులు కూడా ఈ సంస్థ టేకప్ చేస్తుందని వినికిడి.వారాహి బ్యానర్ పై ప్రస్తుతం రెండు సినిమాలు నిర్మాణంలో వున్నాయి. మోహన్ లాల్, గౌతమిలతో మనమంతా, అవసరాల శ్రీనివాస్ డైరక్షన్ జో అచ్యుతానంద సినిమాలు నిర్మాణంలో వున్నాయి.