ఆస్కార్ బరిలో ధనుష్ సినిమా!
చాలా సినిమాలే పోటీ పడ్డా… చివరకు తమిళ హీరో ధనుష్ నిర్మాతగా వ్యవహరించిన ‘విసారణై’ ఆస్కార్ టికెట్ పొందింది. ఉత్తమ విదేశీ క్యాటగిరీలో అవార్డు కోసం భారత్ తరపు నుంచి పోటీకి ఈ సినిమాను ఎంపిక చేశారు. ఈ మేరకు ఎంపిక కమిటీ ధ్రువీకరించింది. వచ్చే ఏడాది ఫిబ్రవరిలో జరిగే ఆస్కార్ అవార్డుల బరిలో చాలా విదేశీ సినిమాలతో ఈ తమిళ సినిమా పోటీ పడాల్సి ఉంటుంది. విదేశీ క్యాటగిరీలో ఈ సినిమా అవార్డును సొంతం చేసుకుంటుందా లేదా.. అనేదెలా ఉన్నా, ఒక దక్షిణాది సినిమా ఈ అర్హత సంపాదించడం ఆసక్తికరమైన అంశం.
ఈ మధ్య కాలంలో ఆస్కార్ ఎంట్రీలు పొందుతున్నది హిందీ, ఉత్తరాది సినిమాలే. దానికి బ్రేకేస్తూ.. ధనుష్ నిర్మిత ‘విసారణై’ ఎంట్రీని సంపాదించింది. వెట్రిమారన్ దర్శకత్వంలో రూపొందిన ఈ సినిమాకు మూలం “లాకప్’’ అనే తమిళ నవల. పోలీసుల కర్కశత్వ సంబంధ చిత్రమిది.
నాయకుడు, అంజలి, భారతీయుడు,జీన్స్ తదితర సినిమాల తర్వాత ఇండియా తరపున ఆస్కార్ బరిలో నిలిచిన సినిమా ఇది.