పనిలో పడిపోతే బాధల్ని మరిచిపోతానంటూ గతంలోనే ఓసారి ప్రకటించిన సమంత, ఇప్పుడు అదే పనిలో ఉంది. నాగచైతన్యతో విడిపోయిన తర్వాత మరోసారి సినిమాలతో బిజీ అయిపోవాలని నిర్ణయించింది.
ఇప్పటికే సౌత్ లో రెండు సినిమాలు ప్రకటించింది. ఇప్పుడు ఓ బాలీవుడ్ ప్రాజెక్టును ఫైనలైజ్ చేసే పనిలో ఉంది. అన్నీ అనుకున్నట్టు జరిగితే మరో నెల రోజుల్లో ఆ బాలీవుడ్ ప్రాజెక్టు వివరాలు బయటకొస్తాయి.
ఫ్యామిలీ మేన్ సీజన్-2తో బాలీవుడ్ లో కూడా క్రేజ్ తెచ్చుకుంది సమంత. ఆ వెంటనే ఆమెకు కొన్ని ఆఫర్లు కూడా వచ్చాయి. ఫ్యామిలీ మేన్-2 స్ట్రీమింగ్ కు వచ్చిన తర్వాత తనకు 2 హిందీ సినిమా ఆఫర్లు వచ్చాయని సమంత ఆమధ్య ఓ ఇంటర్వ్యూలో బయటపెట్టింది. అయితే వాటిని తిరస్కరించినట్టు కూడా
తెలిపింది.
సౌత్ లో ఆమె ఫిమేల్ ఓరియంటెడ్ మూవీస్ చేస్తోంది. గ్లామర్ రోల్స్ ఆపేసింది. ఈ నేపథ్యంలో బాలీవుడ్ లో సమంత ఎలాంటి రోల్స్ ఎంచుకుంటుందనేది ఆసక్తికరంగా మారింది. ఎందుకంటే, గ్లామర్ రోల్స్ తో పాటు..ఫిమేల్ సబ్జెక్ట్స్ చేయడానికి కూడా అక్కడ చాలామంది ఉన్నారు.
శ్రీదేవి మూవీస్ బ్యానర్ పై శివలెంక కృష్ణప్రసాద్ నిర్మాతగా ఓ సినిమా ఎనౌన్స్ చేసింది సమంత. డ్రీమ్ వారియర్ పిక్చర్స్ బ్యానర్ పై మరో సినిమా ప్రకటించింది. తెలుగు-తమిళ భాషల్లో రాబోతున్న ఈ రెండు సినిమాలతో కొత్త దర్శకుల్ని పరిచయం చేయబోతోంది.
నెల రోజుల గ్యాప్ లో ఈ రెండూ సెట్స్ పైకి రాబోతున్నాయి. దాదాపు అదే టైమ్ లో తన బాలీవుడ్ వెంచర్ ను కూడా ప్రకటించే ఆలోచనలో ఉంది సమంత.