అరవింద సమేత విడుదలకు ముందు ఇది తన సినిమా కాదన్నాడు ఎన్టీఆర్. ఇది పూర్తిగా త్రివిక్రమ్ మార్క్ తో వస్తున్న సినిమా అని, అందులో తను నటించానని మాత్రమే చెప్పుకొచ్చాడు. ఆ టైమ్ లో ఎన్టీఆర్ అలా మాట్లాడినప్పుడు చాలామంది డౌట్స్ లేవనెత్తారు. అయితే సినిమా విడుదలైన తర్వాత కూడా ఎన్టీఆర్ మరోసారి త్రివిక్రమ్ కే ఆ క్రెడిట్ ఇచ్చాడు.
"నేను ఉండడం వల్లనే అరవింద సమేత హిట్ అయిందని త్రివిక్రమ్ అన్నారు. ఈ విజయం ఆయనది కాదని నా ఖాతాలో వేశారు. అది తప్పు. ఎందుకు తప్పని అంటున్నానంటే.. ప్రతి ఒక్కరికి త్రివిక్రమ్ నుంచి సినిమా వస్తుందంటే ఒక రకమైన ఆసక్తి. ఆ నమ్మకాన్ని క్రియేట్ చేసుకున్నారు త్రివిక్రమ్. మిమ్మల్ని (త్రివిక్రమ్) చూసి మేం బయల్దేరాం స్వామి. అరవింద సమేత విజయం మీ జర్నీలో భాగం. ఆ ప్రయాణంలో మేమంతా కలిశాం. ఇది ముమ్మాటికీ త్రివిక్రమ్ సినిమా. అతని విజయం."
ఇలా అరవింద సమేత విజయాన్ని త్రివిక్రమ్ ఖాతాలో వేశాడు ఎన్టీఆర్. త్రివిక్రమ్ తనకు 12 ఏళ్ల నుంచి తెలుసంటున్న ఎన్టీఆర్, అతడ్ని కేవలం తను ఓ స్నేహితుడిగా మాత్రమే చూడలేదని.. ఓ గురువుగా కూడా భావించానని అంటున్నాడు.
"చాలా చిత్రాల్లో ఎమోషనల్ గా నేను నటించాను. కానీ ప్రతి ఎమోషన్ ను డ్రైవ్ చేసేది దర్సకుడే. ఓ నటుడికి మొదటి ప్రేక్షకుడు దర్శకుడే. అరవింద సమేత ఓపెనింగ్ సీన్ లో ఓ సన్నివేశం వద్ద ఎలా నటించాలో నాకు తెలియలేదు. నాకు దారి చూపించమని అడిగాను. ఆ రోజు త్రివిక్రమ్ నాకు ఇచ్చిన సమాచారం, నటుడిగా నాకు ఎంతో ఉపయోగపడింది."
ఈరోజు హైదరాబాద్ లో అరవింద సమేత సక్సెస్ మీట్ జరిగింది. ఈ సినిమా ప్రమోషన్ కు సంబంధించి ఎన్టీఆర్ పాల్గొన్న ఆఖరి కార్యక్రమం ఇదే. కుటుంబ సమేతంగా విదేశాలకు వెళ్లబోతున్నాడు ఎన్టీఆర్. తిరిగొచ్చి రాజమౌళి సినిమా వర్క్ స్టార్ట్ చేస్తాడు.