టాప్ హీరో పిలిచి సినిమా చేస్తా పూజ చేసుకో అంటే వద్దు అనేవాళ్లు వుంటారా? కానీ పవన్ కళ్యాణ్ ఇలా ఆఫర్ ఇస్తే ఓ నిర్మాత ఇప్పుడు తనకు కుదరదు అని చెప్పినట్లు బోగట్టా.
టాలీవుడ్ లో పవన్ కళ్యాణ్ తీరు పట్ల విపరీతంగా కామెంట్లు వినిపిస్తున్నాయి. ఏళ్లు పూళ్లుగా దర్శకులను అలా కూర్చోపెట్టి, వాళ్ల జీవితాలతో ఆడుకుంటున్నారని, ఇష్టం లేకపోతే వేరే సినిమా చేసుకోమని చెప్పాలి కానీ వాళ్లను అలా కూర్చోపెట్టి, వాళ్లకి ఆదాయం లేకుండా చేయడం కాదని కామెంట్లు వినిపిస్తున్నాయి.
దాదాపు నాలుగైదేళ్లుగా మైత్రీ సంస్థ నలభై కోట్లకు పైగానే పవన్ కు అడ్వాన్స్ ఇచ్చి, వడ్డీలు కట్టుకుంటూ వెయిటింగ్ లో వుందనే టాక్ వుంది. నిర్మాత ఎఎమ్ రత్నం సినిమా అలా నత్త కన్నా దారుణంగా నడుస్తోంది. పీపుల్స్ మీడియా సినిమా, డివివి దానయ్య సినిమా అలా వున్నాయి. ఇవన్నీ ఇలా వుండగానే పవన్ ఓ నిర్మాతను పిలిచి పూజ చేసుకోమని చెప్పినట్లు తెలుస్తోంది. ఆ నిర్మాత 2014 నుంచి పవన్ తో వున్నారు. చాలా పెట్టుబడులు పెట్టారు అని టాక్.
కానీ పవన్ అలా చెప్పినా, ప్రస్తుతం తనకు ఆరోగ్యం బాగా లేదని, ఇప్పుడు తాను చేయలేనని చెప్పి తప్పుకున్నట్లు తెలుస్తోంది. పవన్ సినిమాల మేకింగ్ తీరు చూసే ఆ నిర్మాత అలా అని వుంటారనే వ్యాఖ్యానాలు వినిపిస్తున్నాయి.
